සිලෝන් තේ හි කතාව ශ්රී ලංකාවේ ආර්ථික, සමාජීය හා ජාතික ඉතිහාසය සමඟ ගැඹුරින් බැඳී පවතින්නකි. 1880 දශකයේදී වාණිජ වගාවක් ලෙස ශීඝ්රයෙන් ව්යාප්ත වීමත් සමඟ තේ, ශ්රී ලංකාවේ ප්රමුඛතම හා කීර්තිමත්ම අපනයන නිෂ්පාදනයක් බවට පත්විය. පරම්පරා ගණනාවක් පුරා මෙරට ආර්ථිකයේ ශක්තිමත් පදනමක් බවට පත්වෙමින්, විදේශ විනිමය ඉපැයීම්, රැකියා සම්පාදනය, ප්රාදේශීය සංවර්ධනය මෙන්ම ලොව පුරා ශ්රී ලංකාව පිළිබඳ අනන්යතාව ගොඩනැගීම සඳහා ද තේ කර්මාන්තය සුවිශේෂී දායකත්වයක් ලබා දී ඇත.
තේ කර්මාන්තය අඛණ්ඩව ව්යාප්ත වෙමින්, සිලෝන් තේ ලොව පුරා වෙළෙඳපොළ තුළ සුවිශේෂී කීර්තියක් අත්කර ගත් අවස්ථාවේදී, එහි වර්ධනය විධිමත්ව මෙහෙයවීම හා නියාමනය කිරීම සඳහා ශක්තිමත් ආයතනික රාමුවක අවශ්යතාව ද ක්රමයෙන් මතුවිය. තේ වගාව, නිෂ්පාදනය, සැකසීම, අලෙවිකරණය හා අපනයනය ආදී සමස්ත ක්රියාවලිය තුළ නිසි අධීක්ෂණයක් පවත්වා ගනිමින්, ගුණාත්මක ප්රමිතීන් ආරක්ෂා කිරීමත්, ජාත්යන්තර වෙළෙඳපොළ තුළ සිලෝන් තේ විසින් දිනාගත් කීර්තිනාමය අඛණ්ඩව සුරක්ෂිත කිරීමත් අත්යවශ්ය විය.
මෙම අවශ්යතාවන්ට ප්රතිචාර දක්වමින්, 1976 වර්ෂයේදී ශ්රී ලංකා තේ මණ්ඩලය මෙරට තේ කර්මාන්තයේ ප්රමුඛතම නියාමන හා පරිපාලන ආයතනය ලෙස ස්ථාපිත කරන ලදී. රජයේ හා පෞද්ගලික අංශයේ නියෝජිතයන් එක් කරගනිමින් ස්ථාපිත කරන ලද තේ මණ්ඩලය, තේ වගාකරුවන් හා නිෂ්පාදකයන්, වෙළෙඳුන් හා අපනයනකරුවන් මෙන්ම වතු කම්කරු ප්රජාව ඇතුළු තේ කර්මාන්තයේ විවිධ පාර්ශ්වයන්ගේ දැනුම, අත්දැකීම් හා දායකත්වය එක් කරගත් ජාතික ආයතනයක් බවට පත්විය.
එතැන් පටන්, ශ්රී ලංකා තේ මණ්ඩලය මෙරට තේ කර්මාන්තයේ නියාමනය, සංවර්ධනය හා ප්රවර්ධනය සඳහා කේන්ද්රීය කාර්යභාරයක් ඉටු කරමින්, සිලෝන් තේ හි ගුණාත්මකභාවය, අව්යාජත්වය සහ ජාත්යන්තර කීර්තිනාමය සුරක්ෂිත කිරීමට අඛණ්ඩව කැපවී සිටී. නියාමන, ප්රවර්ධන හා සංවර්ධන කාර්යයන් ඔස්සේ කර්මාන්තයේ සියලු පාර්ශ්වකරුවන් සමඟ සමීප සහයෝගයෙන් කටයුතු කරමින්, ශ්රී ලංකා තේ කර්මාන්තයේ තරඟකාරීත්වය හා තිරසාරභාවය ශක්තිමත් කිරීමත්, ලෝක තේ වෙළෙඳපොළ තුළ සිලෝන් තේ හි අද්විතීය ස්ථානය තවදුරටත් තහවුරු කිරීමත් තේ මණ්ඩලයේ අඛණ්ඩ මෙහෙවර වේ.
අද වන විට සිලෝන් තේ යනු හුදෙක් අපනයන භාණ්ඩයක් පමණක් නොවේ. එය ශ්රී ලංකාවේ උරුමය, ශිල්පීය නිපුණත්වය, සම්ප්රදාය හා ගුණාත්මකභාවය ලොවට රැගෙන යන ජාතික සන්නාමයකි. දිවයිනේ සශ්රීක කඳුකරයෙන් ඇරඹෙන එහි ගමන, ලොව පුරා පාරිභෝගිකයන් වෙත ශ්රී ලංකාවේ නාමය හා කීර්තිය රැගෙන යන සුවිශේෂී උරුමයක් බවට පත්ව ඇත.
