සිංහ ලාංඡනය යනු සිලෝන් තේ සමඟ අද්විතීය ලෙස බැඳුණු, ලොව පුරා පිළිගැනීමට ලක් වූ සුවිශේෂී සංකේතයකි. දශක ගණනාවක් පුරා ගොඩනැගුණු උරුමය හා කීර්තිනාමය සමඟින් ඉදිරියට පැමිණ ඇති එය, ශ්රී ලංකා තේ ලොව පුරා කීර්තියට පත් කළ උසස් ගුණාත්මකභාවය හා පිරිසිදුභාවය පිළිබඳ අඛණ්ඩ ප්රමිතීන් නිරූපණය කරයි.
සිංහ ලාංඡනයේ හිමිකාරීත්වය ශ්රී ලංකා තේ මණ්ඩලය සතු වන අතර, එය ජාත්යන්තර වෙළෙඳ ලකුණක් ලෙස නීත්යානුකූලව ආරක්ෂා කර ඇත. සිංහ ලාංඡනය භාවිත කිරීමට නිසි අවසරය ලබා ඇති තේ නිෂ්පාදනයක් යනු, ශ්රී ලංකා තේ මණ්ඩලය විසින් නියම කර ඇති අදාළ ප්රමිතීන් හා අවශ්යතාවන්ට අනුකූලව ශ්රී ලංකාවේදී ඇසුරුම් කරන ලද 100% පිරිසිදු සිලෝන් තේ බවට විශ්වාසදායක සහතිකයකි.
පාරිභෝගිකයන් සඳහා, සිංහ ලාංඡනය සැබෑ සිලෝන් තේ හඳුනාගැනීමට පහසු සහ විශ්වාසනීය සලකුණක් වේ. එය දරන සෑම තේ ඇසුරුමක්ම, ශ්රී ලංකාවේ තේ කර්මාන්තය සතු ගුණාත්මකභාවය, උරුමය හා කීර්තිනාමය සමඟ සෘජුවම සම්බන්ධ කරමින් පාරිභෝගික විශ්වාසය තහවුරු කරයි.
සිලෝන් තේ තෝරාගැනීමේදී සිංහ ලාංඡනය සොයන්න, ශ්රී ලංකාවෙන් ලොවට පිරිනමන පිරිසිදු සිලෝන් තේ හඳුනාගැනීමේ විශ්වාසනීය සලකුණ එයයි.
සිංහ ලාංඡනය ලියාපදිංචි කිරීම හා භාවිතය සඳහා වන ක්රියාපටිපාටිය
සිංහ ලාංඡනය භාවිත කිරීම සඳහා නිල අවසරය ලබාගැනීමට අපේක්ෂා කරන තේ නිෂ්පාදකයන්, අපනයනකරුවන් හෝ සන්නාම හිමිකරුවන්, පහත සඳහන් ලියාපදිංචි කිරීමේ ක්රියාපටිපාටිය අනුගමනය කළ යුතුය.
- අයදුම්පත්රය හා මාර්ගෝපදේශ ලබාගැනීම
සිංහ ලාංඡනය භාවිත කිරීම සඳහා වන අයදුම්පත්රය සහ අදාළ මාර්ගෝපදේශ, ශ්රී ලංකා තේ මණ්ඩලයේ තේ රස පරීක්ෂණ ඒකකය වෙතින් ලබාගත හැකිය.
- අයදුම්පත්රය හා තේ ඇසුරුම් ඇගයීම සඳහා ඉදිරිපත් කිරීම
අදාළ මාර්ගෝපදේශයන්ට අනුකූලව අයදුම්පත්රය නිසි පරිදි සම්පූර්ණ කර, සිංහ ලාංඡනය භාවිත කිරීමට අපේක්ෂිත තේ ඇසුරුම් සාම්පල සමඟ ශ්රී ලංකා තේ මණ්ඩලයේ තේ රස පරීක්ෂණ ඒකකය වෙත ඉදිරිපත් කළ යුතුය.
- ඇගයීම හා ලියාපදිංචිය
ඉදිරිපත් කරන ලද තේ ඇසුරුම් සාම්පල ඇගයීමෙන් අනතුරුව, අයදුම්පතේ ප්රතිඵලය පිළිබඳව වැඩකරන දින තුනක් (03) ඇතුළත අයදුම්කරු වෙත දැනුම් දෙනු ලැබේ.
අයදුම්පත අනුමත වූ පසු, අදාළ රු. 5,000/- ක ලියාපදිංචි ගාස්තුව (NBT සහ VAT ඇතුළුව) ගෙවිය යුතුය. ගාස්තුව ගෙවීමෙන් අනතුරුව, වසරක කාලයක් සඳහා වලංගු සිංහ ලාංඡන ලියාපදිංචි සහතිකය අයදුම්කරු වෙත නිකුත් කරනු ලැබේ.
- අතිරේක ඇසුරුම් හා අපනයන වෙළදපොළවල්
එකම ලියාපදිංචි සන්නාම නාමය යටතේ අතිරේක තේ ඇසුරුම් හෝ අතිරේක අපනයන වෙළදපොළවල් සඳහා වෙනම ලියාපදිංචි ගාස්තුවක් අය නොකෙරේ.
කෙසේ වෙතත්, එවැනි අතිරේක ඇසුරුම් සඳහා අදාළ අයදුම්පත් සහ ඇසුරුම් සාම්පල, අපනයනයට පෙර ඇගයීම හා අනුමැතිය සඳහා තේ රස පරීක්ෂණ ඒකකය වෙත ඉදිරිපත් කිරීම අනිවාර්ය වේ.
සිංහ ලාංඡනය ලියාපදිංචි කිරීම හා භාවිතය සඳහා වන අයදුම්පත්රය සහ මාර්ගෝපදේශ
ලියාපදිංචි කිරීමේ ක්රියාපටිපාටිය, සුදුසුකම්, අවශ්යතා සහ සිංහ ලාංඡනය භාවිත කිරීම සම්බන්ධ කොන්දේසි පිළිබඳ වැඩිදුර තොරතුරු සඳහා, නිල අයදුම්පත්රය සහ මාර්ගෝපදේශ පරිශීලනය කරන්න.
සිංහ ලාංඡනය භාවිතය සඳහා වන අයදුම්පත්රය හා මාර්ගෝපදේශ බාගත කරගන්න
